Image default
Mu mahanga

Canada: Abayisiramu bo mu muryango umwe biciwe mu gitero kigambiriwe

Abantu bane bo mu muryango umwe w’abayisilamu bishwe “byagambiriwe” mu gitero cy’imodoka y’ikamyo ku cyumweru, nkuko polisi ya Canada ibivuga.

Icyo gitero cyabereye mu mujyi wa London wo muri Canada mu ntara ya Ontario. Umuhungu w’imyaka icyenda, umwe wenyine warokotse wo muri uwo muryango, ari mu bitaro aho ari kuvurirwa ibikomere bikomeye.

Abantu bahozanya hafi y'ahashyizwe indabo habereye ubwo bwicanyi mu mujyi wa London wo mu ntara ya Ontario muri Canada, ku itariki ya 7 y'ukwa gatandatu mu 2021

Umunya-Canada w’umugabo w’imyaka 20, yarezwe ibyaha bine by’ubwicanyi ndetse n’icyaha kimwe cyo kugerageza kwica.

BBC dukesha iyi nkuru yatangaje ko iki gitero ni cyo cya mbere gihitanye abayisilamu benshi muri Canada, nyuma y’icyabereye ku musigiti wo mu mujyi wa Québec mu mwaka wa 2017, cyiciwemo abantu batandatu.

Umupolisi mukuru Paul Waight yavugiye mu kiganiro n’abanyamakuru ku wa mbere ati:

“Bifatwa ko aba bishwe bagambiriwe kubera ko ari abayisilamu”.

Abantu bacana za buji mu mujyi wa London mu ntara ya Ontario muri Canada, ku itariki ya 7 y'ukwa gatandatu mu 2021

Yavuze ko polisi irimo kwiga ku kuba yarega ibyaha by’iterabwoba uwo mugabo ucyekwaho ubwicanyi, yongeraho ko bifatwa ko ari icyaha gishingiye ku rwango.

Ni iki kizwi ku bishwe?

Bari abagore babiri b’imyaka 74 na 44, ndetse n’umugabo w’imyaka 46 n’umukobwa w’imyaka 15.

Ntabwo batangajwe amazina, nkuko abo mu muryango wabo babisabye.

Umuhungu w’imyaka icyenda ari mu bitaro aho arimo kuvurirwa ibikomere bikomeye ariko bitashyira mu kaga ubuzima bwe, nkuko polisi yabivuze.

Polisi yatangaje ko ucyekwa kugaba icyo gitero ari Nathaniel Veltman, w’imyaka 20, wo muri uwo mujyi wa London wo muri Canada.

Yatawe muri yombi nta kibazo kibayeho mu gace k’ubucuruzi kari mu ntera ya kilometero hafi esheshatu uvuye ahabereye ubwo bwicanyi.

Abantu bari hafi y'ahashyizwe indabo hakorewe ubwo bwicanyi mu mujyi wa London wo mu ntara ya Ontario muri Canada, aha ni ku itariki ya 7 y'ukwa gatandatu mu 2021

Ntabwo biramenyekana niba uwo ucyekwa hari imikoranire afitanye n’itsinda na rimwe rishingiye ku rwango, nkuko umupolisi mukuru Waight yabivuze.

Byakiriwe gute?

Minisitiri mukuru w’intara ya Ontario Doug Ford ni umwe mu bahaye icyubahiro abishwe, yandika kuri Twitter ati:

“Urwango no kwanga abayisilamu NTA mwanya bifite muri Ontario”.

Minisitiri w’intebe wa Canada Justin Trudeau yanditse kuri Twitter ko “ababajwe bikomeye” n’amakuru y’iyicwa ryabo.

Yanditse ati: “Ku bakunzi b’abakorewe iterabwoba mu gikorwa cy’urwango cy’ejo [ku cyumweru], turi hano ku bwanyu”.

Ed Holder, umukuru w’umujyi wa London, yavuze ko icyo gitero ari “igikorwa cy’ubwicanyi bwo mu kivunge bwakorewe Abayisilamu, [bwakorewe] abatuye i London kandi bushingiye ku rwango ruteye ishozi”.

Mu itangazo yasohoye, ‘Mayor’ Holder yavuze ko aba avuga “mu izina ry’Abanye-London bose iyo mvuze ngo imitima yacu yashegeshwe”.

“Turababaye ku bw’uyu muryango…”

Itangazo rye ryongeyeho ko hashyizwe icyunamo cy’iminsi itatu.

Inama nkuru y’abayisilamu muri Canada (NCCM) yasohoye itangazo ivuga ko umugabo ucyekwaho kugaba icyo gitero akwiye kuregwa ibyaha by’iterabwoba.

Ikarita y'ahabereye igitero muri Canada

Mu kwezi kwa mbere mu 2017, Umunya-Canada w’umugabo yishe arashe abantu batandatu barimo basengera mu musigiti wo mu kigo ndangamuco cya kisilamu cy’i Québec, akomeretsa bikomeye abandi batanu. Uwagabye icyo gitero yakatiwe gufungwa burundu.

Mu mwaka wa 2018 ni bwo habaye igitero cya mbere cyo kugongesha imodoka cyiciwemo benshi muri Canada, ubwo umugabo yahuranyaga imodoka y’ivani mu itsinda ry’abagendaga ku maguru mu mujyi wa Toronto, yica abantu 10.

iriba.news@gmail.com

Related posts

‘Irondaruhu’ kimwe mu byakuye Igikomangoma Harry n’umugore we Meghan i Bwami

Ndahiriwe Jean B.

Jong-un yinjiye mu ntambara ya filime, ururimi n’imyambarire

Ndahiriwe Jean B.

Muri Nigeria muganga yishwe na Covid-19 amaze kuyanduzwa n’umurwayi

Emma-marie

Leave a Comment

Skip to toolbar