Image default
Mu mahanga

Ethiopia: Raporo ya UN ivuga ko imirwano yabereye muri Tigray yari irimo n’ingabo z’ibindi bihugu

Raporo nshya y’umuryango w’abibumbye (ONU/UN) ivuga ko ingabo za Somalia zarwanye ziri ku ruhande rw’ingabo za Eritrea mu mirwano mu karere ka Tigray ko mu majyaruguru ya Ethiopia.

Iyi raporo yakozwe n’intumwa yihariye ya ONU kuri Eritrea Mohamed Abdelsalam Babiker, ivuga ko abasirikare ba Somalia barwanye ku rugamba rwo muri Tigray.

Igira iti: “Hamwe n’amakuru yuko ingabo za Eritrea zarwanye muri Tigray, intumwa yihariye yabonye n’amakuru ko abasirikare ba Somalia bakuwe mu bigo by’imyitozo muri Eritrea bajyanwa ku rugamba muri Tigray, aho baherekeje ingabo za Eritrea ubwo zambukaga umupaka wa Ethiopia”.

BBC dukesha iyi nkuru ikomeza ivuga ko abarwanyi b’Abanya-Somalia batangajwe ko bari bari mu mujyi w’amateka wa Aksum (Axoum) muri Ethiopia. Leta ya Somalia yahakanye kugira uruhare mu mirwano yo muri Tigray.

Eritrea ntabwo yemeye gukorana n’iri perereza rya ONU, ryibanze ahanini ku ko uburenganzira bwa muntu bwifashe muri Eritrea.

Intumwa yihariye ya ONU yavuze ko raporo ye ishingiye ku byo yagenzuye no ku makuru yakuye ahantu hatandukanye.

Mu kwezi kwa kabiri, umuryango uharanira uburenganzira bwa muntu Amnesty International washinje ingabo za Eritrea kwica abantu babarirwa mu magana mu mujyi wa Axoum ahanini mu minsi ibiri yo mu kwezi kwa cumi na kumwe mu 2020.

Amnesty International yavuze ko ubwo bwicanyi bushobora kwitwa icyaha cyibasira inyoko muntu ibyo abategetsi ba Eritrea bahakanye.

Imirwano muri Tigray yatangiye mu kwezi kwa cumi na kumwe mu 2020, ubwo ingabo za leta ya Ethiopia zagabaga igitero cyo gukuraho ishyaka rya TPLF ryari ku butegetsi muri ako karere, nyuma yuko abarwanyi baryo bafashe ibigo bya gisirikare bya leta muri Tigray.

Kuva imirwano yatangira mu mwaka ushize, byibazwa ko abantu babarirwa mu bihumbi bamaze kwicwa, naho abandi babarirwa muri za miliyoni bacyeneye imfashanyo.

iriba.news@gmail.com

Related posts

Qatar: Uruhinja rwatawe ku kibuga cy’indege rwatumye abagore basakwa mu myanya ndangagitsina

Emma-marie

South Africa: Ukekwaho kwica abagore batanu ‘yiyahuriye muri kasho ya polisi’

Emma-marie

U Bufaransa: Isake yitwa Maurice yigeze kujyanwa mu rukiko kubera agasaku kayo yapfuye

Emma-marie

Leave a Comment

Skip to toolbar