Image default
Mu mahanga

Karidinali agiye kuburanishwa ku kunyereza umutungo wa Kiliziya Gatolika

Umucamanza w’i Vatican yategetse ko abantu 10, barimo na karidinali w’Umutaliyani, baburanishwa ku bivugwa ko ari ibyaha bijyanye n’imari.

Karidinali Angelo Becciu yabaye uwihayimana wa mbere wo ku rwego rwo hejuru cyane i Vatican urezwe ibyaha birimo kunyereza umutungo no gukoresha nabi ububasha bwe.

Uyu Karidinali w’imyaka 73, uhakana avuga ko nta kintu kibi yakoze, mu kwezi kwa cyenda mu 2020 yaregujwe, ariko yagumanye urwego rwa karidinali.

BBC yanditse ko Ibyo birego bijyanye n’igurwa ry’inyubako ibarirwa muri za miliyoni z’amadolari yaguzwe i London mu Bwongereza hakoreshejwe amafaranga ya Kiliziya Gatolika.

Karidinali Becciu yari umujyanama wa hafi wa Papa Francis, kandi na mbere yaho yari afite umwanya ukomeye mu bunyamabanga bwa Vatican, urwego rucunga imfashanyo za Kiliziya.

Azahatwa ibibazo ku masezerano atavugwaho rumwe yabayemo igihombo, ajyanye no gushora imari mu nyubako ihenze i London mu gihe ari akuriye ubunyamabanga. Ayo masezerano arimo gukorwaho iperereza ryo mu rwego rw’imari.

Miliyoni 200 z’amadolari y’Amerika zarishywe kuri iyo nyubako iri ku muhanda Sloane Avenue, zavuye mu mafaranga ya Kiliziya biciye mu mafaranga abitse ahandi hantu no mu zindi kompanyi kugira ngo asoreshwe imisoro micyeya – amasezerano uyu Karidinali mbere yigeze kwisobanuraho ayashyigikira.

Itangazo ryasohowe ku wa gatandatu n’abari hafi ye rivuga ko Karidinali yavuze ko arimo “kuzira ubugambanyi” kandi ko ari “umwere byuzuye”, nkuko bitangazwa n’ibiro ntaramakuru AFP.

Babiri bahoze ari abakuru b’ubutasi bwo mu rwego rw’imari rwa Vatican bari muri abo bantu 10 bashinjwa.

Baregwa ibyaha birimo kunyereza umutungo, iyezandonke (gukoresha amafaranga afite inkomoko mu cyaha), uburiganya, ubwambuzi no gukoresha ububasha nabi.

Mu mwaka ushize, umutaliyanikazi wakoreraga karidinali Becciu yarezwe kunyereza umutungo.

Iburanisha rya mbere riteganyijwe kuba ku itariki ya 27 y’uku kwezi kwa karindwi, nkuko bikubiye mu itangazo riri ku rubuga rw’amakuru Vatican News.

Iriba.news@gmail.com

Related posts

“Hashize igihe kirekire London yarabaye ahantu abantu baza kogereza amafaranga babonye mu buryo bubi”

Ndahiriwe J. B

Samia Suluhu Hassan wa Tanzania yageze i Bujumbura (Amafoto)

Ndahiriwe J. B

Maroc: Umwana wapfuye nyuma yo kumara iminsi mu mwobo yashenguye imitima ya benshi

Ndahiriwe J. B

Leave a Comment

Skip to toolbar