Image default
Abantu

Vestine na Dorcas: Mike Karangwa yatanze ikirego muri RIB

Mike Karangwa yijeje Abanyarwanda ko Irené Mulindahabi natamusaba imbabazi azamugeza mu butabera.

Ni ko byagenze, abagenzacyaha binjiye muri dosiye.

Umuvugizi w’Urwego rw’Igihugu rw’Ubugenzacyaha, Dr Thierry Murangira yabwiye Popote.rw ati, “We received a complaint of Michel, the case is under investigation”.

Bivuze ngo, “Twakiriye ikirego cya Michel (Mike Karangwa), ikibazo kirimo gukorwaho iperereza.”

Mike Karangwa

Byose bijya gutangira Mulindahabi yasohoye itangazo rivuga ko ahagaritse imikoranire yagiranaga n’abahanzi Vestine na Dorcas yafashaga binyuze muri sosiyete ye ya MIE.

“MIE yifuje kumenyesha abakunzi bayo ndetse n’umuryango mugari wa muzika ko guhera ku wa 7 Nyakanga 2021 ibaye ihagaritse ibikorwa byose yakoranaga n’abahanzi Ishimwe Vestine na Kamikazi Dorcas.” Ni uku itangazo ryagiraga.

Mu mpamvu zo gutandukana kwabo ariko, Mulindahabi aza gutunga agatoki Mike Karangwa na Nzizera Aimable, avuga ko aba bagabo ari bo bamushwanishije na nyina w’aba bana.

Mike Karangwa na Nzizera Aimable bafatanya mu mitegurire y’ibitaramo bya Rwanda Gospel Stars Live bahindutse iciro ry’imigani ku mbuga nkoranyambaga.

Hari ababise abagambanyi, abandi babavumira ku gahera bavuga ko batakabaye bakora ibintu bituma Dorcas na Vestine bava mu maboko ya Mulindahabi wabamenyekanishije.

Hakabaho ariko n’ikibazo cya Youtube Channel ya Vestine na Dorcas, Mulindahabi agashinjwa na nyina w’aba bana ko ayisaruramo akayabo akikungahaza wenyine.

Mulindahabi akavuga ko koko yasaruyemo amafaranga ariko ko ari make ugereranyije n’ayo yashoye, kandi ko gusarura bidatangaje kuko abafasha nka ‘business’.

Nyina w’aba bana Uzamukunda Elisabeth byamuvanye iwe i Musanze bimuzana i Kigali aje guhura n’abanyamakuru ngo ababwire intimba aterwa no kubura Channel y’abana be.

Yibanze kuri ‘Cano’, yumvikanisha ko icy’ingenzi ari uko abana be basubizwa cano yabo kabone nubwo Mulindahabi atasubiza amafaranga amaze kuyisaruramo.

Ibya cano byaravuzwe biratinda, ndetse abanyarwenya babibyaza umusaruro bigana uburyo nyina w’aba bana yasabaga cano ashishikaye nk’isoko y’imibereho.

Aimable ushinjwa kuba inyuma y’itandukana rya Mulindahabi n’aba bana, yemeye ko koko yavuganaga n’umuryango wabo ariko ko bitari bigamije ikibi, ahubwo yakundaga abana.

Yasobanuye ko yabafashije byinshi birimo kubagurira imyenda na telefone, ndetse yewe ngo anagerageza kunga Mulindahabi n’umuryango w’abana nubwo bitakunze.

Nta kurya umunwa, Aimable yavuze ko habuze gato ngo urushako rwa nyina w’aba bana na se rusenyuke ngo kubera umwiryane Mulindahabi yateye hagati y’abo babyeyi.

Mike Karangwa we ariko ashimangira ko yabonye nyina w’aba bana bwa mbere umunsi uwo mubyeyi yaje kuganira n’abanyamakuru, akababazwa no gushinjwa ubugambanyi.

Mike Karangwa ashize amanga yavuze ko nta ruhare na ruto yagize mu gutandukanya Mulindahabi n’aba bahanzi, anyomoza ibyo Mulindahabi yanditse kuri Instagram.

Irene Murindahabi

Karangwa yunzemo ko gushinjwa amakosa atagizemo uruhare byakozwe nk’ibigamije kumwicira izina, kandi koko ku mbuga nkoranyambaga benshi baramwihaye karahava.

Nyuma yaho ariko Mike yapostinze ubutumwa bw’abantu batandukanye, bwerekana ko bamwiseguyeho nyuma yo kumenya ko ibyo Mulindahabi yamuvuzeho atari ukuri.

Ubanza nta mbabazi yamusabye kuko RIB ivuga ko yatangiye gukora iperereza kuri Mulindahabi.

Turacyagerageza kuvugana na Mulindahabi na Karangwa ngo twumve icyo bavuga kuri iki kirego gishya gishobora gutuma bahurira imbere y’umucamanza.

SRC: POPOTE .RW

Related posts

Prof. Laurent Nkusi yitabye Imana

Emma-marie

Rwamagana: Umwalimu aracyekwaho gusambanya umwana

Ndahiriwe Jean Bosco

Manzi Fondation yagobotse imiryango irwaje Covid-19

Leave a Comment

Skip to toolbar