Image default
Iyobokamana

Inkongi yibasiye Urusengero yica benshi barimo n’abana b’impanga

Abana bagera kuri 15 bari mu bantu 41 bapfiriye mu nkongi y’umuriro yafashe urusengero rwa Coptic Christian mu Misiri ku cyumweru. 

Uru rusengero rwo mu gace ka Giza rwari rwuzuye abantu bari baje kumva misa yo ku cyumweru mu gitondo, barimo abana n’ababyeyi babo.

Abandi bana benshi bari mu ishuri, ririmo n’iry’incuke, muri iyi nzu y’amagorofa ane yafashwe n’inkongi bikekwa n’abakora iperereza ko yavuye ku kibazo mu mashanyarazi.

Minisiteri y’ubuzima ivuga ko abapfuye benshi bazize guhumeka umwotsi, hamwe n’umubyigano wo guhunga bava muri urwo rusengero rwari rufunze.

Aba bana batatu b’impanga Philopator (ibumoso), Youssef (hagati) na Mohrael (iburyo) Amir bari mu baguye muri iyi nkongi

Amakuru y’ababuze ababo, abakozi b’urusengero, ibitaro by’aho, n’ibinyamakuru mu Misiri avuga ko mu bana bapfuye harimo abana b’impanga batatu b’imyaka itanu; Mohrael, Youssef na Philopator Bassem Amir.

Aba bavandimwe bapfanye na nyina Irina Atef Ramzi w’imyaka 34, nyirakuru Magda Habib Nabih w’imyaka 61, na nyinawabo Mirna Atef Ramzi w’imyaka 25.

Umuhanzi Miretya Emad, akaba mwishywa wa Magda kandi mubyara wa Irina, yatangaje akababaro ke mu butumwa yashyize kuri Facebook.

Yanditse ati: “Hamwe na Kristu, bari aheza kurushaho. Mutwibuke imbere y’ubwami bw’impuhwe. Ubu mfite abamarayika batandatu mw’ijuru.”

Umuryango wa Miretya Emad si wo wonyine wapfushije abana batatu muri aka kaga.

Abana b’abakobwa babiri b’impanga b’imyaka itanu, Mariam na Barsina Tamir Wajih, na musaza wabo w’imyaka itatu Ibrahim, bari ku rutonde rw’abapfuye batangajwe n’ibitaro bya Imbaba General Hospital.

Amafoto yafashwe mu muhango wo gushyingura ku cyumweru nijoro yerekanye nyina arimo aririra iruhande rw’isanduku yabo azamuye intoki eshatu asobanura abana be.

Abandi bapfuye bashyizwe ku rutonde rw’ibitaro barimo Karolos w’imyaka 10, Mina Azmi w’imyaka 13 na Mina Fakhir w’imyaka 16.

Ikinyamakuru Copts United kivuga ko nyina wa Korolos na we yapfiriye muri iyi nkongi. Ariko ko umuvandimwe we Rami yarokotse.

Rami, aho yari aryamye mu bitaro ku cyumweru, yabwiye abanyamakuru akaga kababayeho.

Perezida wa Misiri yategetse ingabo gusana uru rusengero

Yavuze ko bajyanye mu misa uko ari batatu (we, umuvandimwe we, na nyina), ariko inkongi yatera bagatandukana kandi ko atazi uko byabagendekeye.

Bivugwa ko Rami nyuma yabwiwe ibyabo na babyara be nyuma y’ibyo yari yabwiye abanyamakuru.

Perezida Abdel Fattah al-Sisi wa Misiri yihanganishije imiryango yabuze ababo “basanze Umwami wabo bari muri imwe mu ngoro yo kumuramya.”

Sisi yategetse igisirikare gusana uru rusengero.

Abakristu b’aba-Coptic bagera kuri miliyoni 10, ku baturage miliyoni 103 ba Misiri biganjemo abasilamu.

Bavuga ko bakorerwa ivangura kandi ko bagira uruhare ruto mu buzima bwa Misiri ugereranyije n’umubare wabo.

Ibinyamakuru mu Misiri bitangaza amagambo y’umugore wavuze ko yapfushije abana babiri muri uyu muriro, umwe muri bo witwaga Mina.

Esnad asobanura ko ari we wababyukije ngo bajye mu misa, ati: “Ni jyewe wabajyanye mu ijuru.”

Yongeraho ati: “Mina yansabye ko yajyayo kuwa gatatu ariko ndanga mubwira ko agomba kujyayo uyu munsi.”

Musenyeri w’uru rusengero, Abdul Masih Bakhit, w’imyaka 50, ari mu bantu bakuru bapfuye batangajwe n’ibitaro.

Umugore we yafotowe ku muhango wo gushyingura, afite ibisa n’ibisigazwa by’imyambaro y’idini y’umugabo we.

@BBC

Related posts

Abavuga ko ari abayoboke ba ADEPR barasaba ko abayobozi bashyiriweho na RGB bavaho

Emma-marie

Iwawa: ADEPR yabatije abasaga 200 bahoze ari inzererezi n’abanywi b’ibiyobyabwenge

Emma-marie

Insengero za Methodiste Uni zigiye gutezwa cyamunara

Ndahiriwe Jean Bosco

Leave a Comment

Skip to toolbar